ఖాకీ సినిమా స్ఫూర్తితో..చోరీలకు పాల్పడుతున్న దొంగల ముఠా అరెస్టు

ఖాకీ సినిమా స్ఫూర్తితో దేశంలోని పలు రాష్ట్రాల్లో చోరీలకు పాల్పడుతున్న అంతర్ రాష్ట్రాల దొంగల ముఠాను కృష్ణా జిల్లా గుడివాడ రూరల్ పోలీసులు అరెస్టు చేశారు. గుడివాడ గౌతమ్ స్కూల్ ఏరియాలో జరిగిన చోరీ కేసు దర్యాప్తును చేపట్టిన గుడివాడ రూరల్ సర్కిల్ పోలీసులకు చోరీకి పాల్పడింది అంతర్ ర్రాష్ట్రల దొంగల ముఠా సభ్యులుగా గ్రహించారు. 150 సీసీ కెమెరాల ఫుటేజ్ ను పరిశీలించిన పోలీసులు, లారీ ద్వారా దొంగల ముఠా చోరీలకు పాల్పడుతున్నట్లు గుర్తించారు . అధికారుల సూచనలతో చాకచక్యంగా వ్యవహరించిన పోలీసులు నలుగురు సభ్యుల దొంగల ముఠాను అదుపులోకి తీసుకొని 12 లక్షల 50 వేల సొత్తును స్వాధీనం చేసుకున్నారు. కార్తీ హీరోగా నటించిన ఖాకీ సినిమా స్ఫూర్తితో లారీలలో ప్రయాణిస్తూ దొంగల ముఠా చోరీలకు పాల్పడుతున్నట్లు గుర్తించామని గుడివాడ డి.ఎస్.పి సత్యానందం కేసు వివరాలను మీడియాకు వెల్లడించారు.
నలుగురు ముఠా సభ్యులపై వివిధ రాష్ట్రాల్లో 18 పైగా కేసులు నమోదు అయ్యాయని ఆయన తెలిపారు. గుడివాడలో జరిగిన చోరీ కేసులో నూరు శాతం నగదు, ఆభరణాలను రికవరీ చేశామని డీఎస్పీ సత్యానందం చెప్పారు. చాకచక్యంగా వ్యవహరించి చోరీ కేసును చేదించడమే కాక, అంతర్ రాష్ట్రాల దొంగల ముఠాను పట్టుకున్న రూరల్ జయకుమార్, రూరల్ పోలీస్ స్టేషన్ ఎస్ఐలు, సిబ్బందిని డి.ఎస్.పి అభినందించారు.